Nëse vitin 2022 do ta kishim ndarë në dy periudha atëherë mund të themi se në periudhën e parë (janar – qershor) ekosistemin keqinformues në Kosovë e kanë dominuar përmbajtjet që kishin të bënin me agresionin rus në Ukrainë. Në pjesën e dytë, mund të themi se Veriu i Kosovës ka qenë arena e keqinformimit për shkak të shtimit të zhvillimeve në këtë zonë të Kosovës.
Gjatë ngjarjeve në veri të Kosovës, kryesisht të datës 31 korrik, janë bërë një sërë raportimesh me përmbajtje të pakonfirmuar. Në mesin lajmeve janë ato me përmbajtje të rreme për të plagosur, si rezultat i përleshjeve. Gjithashtu, në disa media me përmbajtje në gjuhën serbe janë publikuar edhe artikuj me përmbajtje tendencioze, ku pretendohet pa fakte për ekzistimin e disa planeve të institucioneve kosovare për sulme ndaj serbëve në veri të Kosovës. Përkundër që lajmet për ngjarjet rreth veriut u publikuan kryesisht në fund të muajit korrik, ato mbizotëruan mediat e, sidomos, mediat e afërta me pushtetin në Serbi, që ishin faktori kryesor dezinformues rreth ngjarjeve në veri të Kosovës.
Kjo temë e ka dominuar ekosistemin keqinformues edhe në muajin gusht. Me disa përjashtime, artikujt me karakter keqinformues për zhvillimet në veriun e Kosovës janë shpërndarë nga mediat e Serbisë duke manipuluar fakte dhe shpërndarë përmbajtje të rreme e të paverifikuar. Në këta artikuj pretendohet se institucionet e Kosovës po përgatitin sulme e incidente të motivuara etnikisht ndaj serbëve në veri, se Policia e Kosovës nuk ka të drejtë të operojë në veriun e Kosovës e kështu me radhë. Artikuj të tilla janë shpërndarë pas tensioneve në veri në fund të korrikut 2022.
Artikujt lidhur me veriun e Kosovës që trajtojnë çështje politike e të sigurisë, edhe gjatë muaji shtator, në tërësi janë shpërndarë nga mediat serbe duke manipuluar fakte dhe ngritur teori konspirative për situatën e sigurisë në këtë pjesë të vendit. Në këto publikime pretendohet pa bazë se SHBA-ja synon të destabilizojë veriun, se kryeministri Kurti kërkon të nis konflikt të ri në veri e shtrembërimin e fakteve se Policia e Kosovës nuk ka të drejtë operojë në veri të Kosovës.
Tema e veriu ka qenë pjesë e keqinformimit edhe gjatë muajit tetor duke përfshirë këtu edhe bisedimet rreth dialogut Kosovë-Serbi, si dhe çështja e krijimit të Asociacionit të Komunave Serbe (AKS).
Për zhvillimet në veriun e Kosovës gjatë muajit nëntor, artikujt keqinformues janë publikuar nga mediat serbe, të cilat janë vlerësuar si përmbajtje e pa verifikuar, dezinformatë dhe teori konspirative. Përmes tyre pretendohet pa fakte për dërgimin e 40 automjeteve të Policisë së Kosovës në veri dhe se kryeministri Kurti po kërkon luftë dhe eliminimin e serbëve. Gjithashtu, gjatë këtij muaji një aktivist serb i shoqërisë civile në veri pretendonte, po ashtu pa fakte, se ishte sulmuar nga Policia e Kosovës, gjë që ishte mohuar nga kjo e fundit dhe rasti është ende duke u hetuar nga Inspektorati Policor i Kosovës.
Veriu i Kosovës ka qenë pjesë e keqinformimit edhe gjatë muajit dhjetor. Temat të cilat kanë dominuar gjatë këtij muajit kanë qenë, pretendimet se sulmet ndaj objekteve të KKZ-së në veri të Mitrovicës janë bërë nga grupe të maskuara e jo nga policia e Kosovës, për ekzistimin e një liste prej 230 serbëve që pritet të arrestohen, për një plan për vrasje të serbëve nga ana Kurtit dhe rreth numrit të pjesëmarrësve në protestën e organizuar në Rudarë të Zveqanit.
