Shtrirja diplomatike e Kosovës në botë

Përgatiti: Etrit Rexhepi

Marrëveshja e Uashingtonit për normalizimin ekonomik mes Kosovës dhe Serbisë, e arritur në shtator 2020, i hapi rrugën njohjes së pavarësisë së Kosovës nga Izraeli. Më 1 shkurt 2021, Izraeli zyrtarisht njohu Kosovën si shtet, ndërsa një muaj më pas Kosova hapi ambasadën e saj në Jerusalem. Kjo përfaqëson njohjen e fundit të pavarësisë së Kosovës dhe hapjen e fundit të një ambasade nga ky shtet.

Por, në sa vende dhe cilat shtete ka hapur Kosova ambasada dhe konsullata?

Sipas listës së Ministrisë së Punëve të Jashtme dhe Diasporës (MPJD), Kosova ka hapur misione diplomatike dhe konsullore në 33 vende. Në këto vende, Kosova përfaqësohet kryesisht me ambasada, përveçse në Serbi, ku ka një zyrë të veçantë.

Në aspektin e shtrirjes gjeografike, Kosova ka përqendrim më të madh të pranisë diplomatike në Evropë, me ambasada në 21 vende (duke përfshirë edhe Turqinë). Në Azi, Kosova përfaqësohet në shtatë shtete. Ndërsa në kontinentet e Australisë dhe Afrikës, Kosova ka nga një ambasadë (në Australi dhe Senegal, respektivisht). Në Amerikë, Kosova ka hapur ambasada në SHBA, Kanada dhe Panama, e cila është përfaqësia e vetme në Amerikën Latine.

Pas shpalljes së pavarësisë më 17 shkurt 2008, Kosova hapi ambasada në vendet si SHBA, Francë, Belgjikë, Mbretëria e Bashkuar, Gjermani, Itali, Austri, Zvicër, Shqipëri dhe Turqi (këtu).

Lista e shteteve ku Kosova ka hapur ambasadat e saj:

1. Arabi Saudite
2. Australia
3. Austria
4. Bangladeshi
5. Belgjika
6. Bullgaria
7. Çekia
8. Emiratet e Bashkuara Arabe
9. Franca
10. Gjermania
11. Holanda
12. Hungaria
13. Italia
14. Izraeli
15. Japonia
16. Kanada
17. Katari
18. Kroacia
19. Mali i Zi
20. Maqedonia e Veriut
21. Mbretëria e Bashkuar
22. Norvegjia
23. Panamaja
24. Portugalia
25. Senegali
26. Serbia
27. Sllovenia
28. Shqipëria
29. Shtetet e Bashkuara të Amerikës
30. Suedia
31. Tajlanda
32. Turqia
33. Zvicra