Nga 171 vota në Asamblenë Parlamentare të Këshillit të Evropës për anëtarësimin e Kosovës në këtë organizatë, 131 prej tyre ishin pro, 29 deputetë votuan kundër e 11 abstenuan. Votimi u mbajt të martën, 16 prill.
Kosova mori më shumë se 2/3 e votave. Tani pret votimin në Këshill të Ministrave të jashtëm të shteteve anëtare për t’u bërë anëtare e Këshillit të Evropës. Takimi i ardhshëm i ministrave pritet të mbahet në mes të majit.
Këshilli i Evropës ka 46 shtete anëtare. Prej tyre 34 janë shtete që e njohin pavarësinë e Kosovës e 12 që nuk e njohin (Armenia, Azerbajxhani, Bosnje e Hercegovina, Qiproja, Gjeorgjia, Greqia, Moldavia, Rumania, Serbia, Sllovakia, Spanja dhe Ukraina).
Si votuan shtetet që e njohin pavarësinë e Kosovës?
Shqipëria
Në votim morën pjesë katër deputetë dhe të gjitha ishin vota pro.
Andorra
Andorra ka dy përfaqësues në Asamblenë Parlamentare. Të dy votuan pro anëtarësimit të Kosovës.
Austria
Austria ka gjashtë përfaqësues në Asamblenë Parlamentarë të KiE-së. Pesë përfaqësues të saj morën pjesë në votim. Të gjithë votuan për pranimin e Kosovës.
Belgjika
Nga shtatë përfaqësues sa i ka Belgjika, katër morën pjesë në votim dhe të gjitha ishin pro.
Bullgaria
Bullgaria i ka gjashtë përfaqësues në Asamblenë Parlamentare të Këshillit të Evropës. Tre prej tyre votuan e të tre patën votë pro.
Kroacia
Nga pesë përfaqësues kroatë, tre votuan pro Kosovës. Dy nuk morën pjesë në votim.
Çekia
Nga shtatë përfaqësues që i ka Çekia në Asamblenë Parlamentare të KiE-së, vetëm një mori pjesë në votim. Pati votë pro Kosovës.
Danimarka
Danimarka ka pesë përfaqësues në këtë asamble. Katër prej tyre votuan pro e një nuk mori pjesë në votim.
Estonia
Të tre përfaqësuesit e Estonisë votuan pro Kosovës.
Finlanda
Votë maksimale pro Kosovës dhanë edhe pesë përfaqësuesit e Finlandës.
Franca
Franca ka 18 përfaqësues në Asamblenë Parlamentare të KiE-së. Në votim morën pjesë vetëm tetë prej tyre. Nga ta gjashtë ishin pro e dy kundër.
Gjermania
Nga 18 përfaqësues sa i ka Gjermania në Asamblenë Parlamentare, shtatë votuan pro, dhe nga një abstenuan e dolën kundër.
Hungaria
Hungaria ka shtatë përfaqësues në këtë asamble. Në votim morën pjesë katër përfaqësues dhe të gjithë ishin kundër.
Islanda
Islanda ka tre përfaqësues në asamble. Njëë përfaqësues islandez mori pjesë në votim dhe ishte pro.
Irlanda
Nga katër përfaqësuesit e Irlandës, një mori pjesë në votim dhe votoi pro Kosovës.
Italia
Nga 18 përfaqësues sa i ka Italia në Asamble gjashtë votuan pro anëtarësimit të Kosovës. Gjashtë abstenuan e një ishte kundër.
Letonia
Tre përfaqësuesit të Letonisë votuan pro Kosovës.
Lihtenshtajni
Edhe dy përfaqësuesit e Lihtenshtajnit votuan pro anëtarësimit të Kosovës në KiE.
Lituania
Lituania i ka katër përfaqësues në Asamblenë Parlamentare të KiE-së. Të katërtit votuan pro anëtarësimit të Kosovës.
Luksemburgu
Në votim morën pjesë dy nga tre përfaqësuesit e Luksemburgut. Të dy votuan pro pranimit të Kosovës.
Malta
Tre përfaqësuesit maltezë votuan pro anëtarësimit të Kosovës.
Monako
Të dy përfaqësuesit Monakos votuan pro Kosovës.
Mali i Zi
Mali i Zi ka tre përfaqësues në Asamble. Të tre votuan. Një ishte për, një kundër e një abstenoi.
Holanda
Holanda ka shtatë përfaqësues në Asamble. Në votim morën pjesë vetëm dy dhe të dy patën votë pro Kosovës.
Maqedonia e Veriut
Dy nga tre përfaqësues të Maqedonisë së Veriut morën pjesë në votim. Të dy ishin pro.
Norvegjia
Norvegjia i ka pesë përfaqësues në Asamblenë Parlamentare të KIE-së. Të pestit votuan pro pranimit të Kosovës.
Polonia
Katër nga 12 përfaqësuesit e Polonisë votuan pro anëtarësimit të Kosovës. Tetë të tjerë nuk morën pjesë në votim.
Portugalia
Portugalia i ka shtatë përfaqësues në Asamble. Nga ta morën pjesë dy dhe të dy patën votë pro Kosovës.
San Marino
San Marino i ka dy përfaqësues në Asamble. Njëri prej tyre votoi pro e tjetri nuk mori pjesë në votim fare.
Sllovenia
Një përfaqësues slloven mori pjesë në votim. Ai votoi pro Kosovës e dy të tjerët nuk votuan.
Suedia
Nga gjashtë përfaqësues që ka Suedia në këtë asamble pesë votuan dhe të gjithë ishin pro.
Zvicra
Tre nga gjashtë përfaqësuesit e Zvicrës votuan pro Kosovës. Tre të tjerët nuk morën pjesë në votim.
Turqia
Turqia ka 18 përfaqësues në Asamble. Të gjithë votuan pro pranimit të Kosovës.
Mbretëria e Bashkuar
Mbretëria e Bashkuar ka 18 përfaqësues. Nga ta tre morën pjesë dhe të tre votuan pro.
Si votuan shtetet që nuk e njohin pavarësinë e Kosovës?
Armenia
Armenia nuk e njeh Kosovën. Megjithatë tre nga katër përfaqësuesit e këtij shteti votuan pro pranimit të Kosovës në Këshill të Evropës. Përfaqësuesi tjetër nuk mori pjesë në votim.
Azerbajxhani
Azerbajxhani i ka gjashtë përfaqësues. Asnjë nga ta nuk mori pjesë në votim.
Bosnje e Hercegovina
Nga pesë përfaqësues që i ka shteti që nuk e njeh Kosovën, dy vota ishin pro e dy kundër. Një nuk votoi.
Gjeorgjia
Gjeorgjia që nuk e njeh pavarësinë e Kosovës, ka pesë përfaqësues në AP, por asnjëri prej tyre nuk mori pjesë në votim.
Greqia
Edhe Greqia është shtet që nuk e njeh Kosovën. I ka shtatë anëtarë në Asamblenë Parlamentare, por në votim morën pjesë pesë. Katër ishin pro dhe një ishte kundër.
Moldavia
Republika e Moldavisë i ka pesë përfaqësues në Asamblenë Parlamentare të Këshillit të Evropës. Tre përfaqësues të saj morën pjesë në votim dhe të tre abstenuan. Ky shtet nuk e njeh Kosovën.
Qipro
Qiproja është shtet tjetër anëtar i Këshillit të Evropës e që nuk e njeh pavarësinë e Kosovës. Nga tre përfaqësues të këtij shteti në Asamble, dy votuan dhe të dy ishin kundër.
Rumania
Rumania, që nuk e njeh pavarësinë e Kosovës, i ka 10 përfaqësues në Asamblenë Parlamentare të KiE-së. Dy prej tyre votuan pro e të tjerët nuk morën pjesë në votim.
Serbia
Serbia, të cilës iu kundërshtuan edhe amendamentet, pati votë maksimale kundër Kosovës. Në votim morën pjesë shtatë përfaqësues, aq sa i ka Serbia në këtë asamble.
Sllovakia
Sllovakia që nuk e njeh pavarësinë e Kosovës nuk mori pjesë në votim. Ky shtet i ka pesë përfaqësues në Asamble.
Spanja
Spanja i ka 12 përfaqësues në Asamble. Nëntë prej tyre morën pjesë në votim, tetë ishin kundër e një pro.
Ukraina
Ukraina i ka 12 përfaqësues në asamble. Vetëm një mori pjesë në votim dhe ai votoi pro Kosovës.
Artikull nga Endrit Berisha
